加息對樓市影響

自8月7日起，多間銀行調高按揭息率，將新做按揭H按的鎖息上限及P按按息各調升10點子。其實今次加息對大多數現有按揭是沒有影響的， 因為現有按揭大多有用P計2.15%的封頂位。

其實今次加按息，原因好簡單，自美國聯儲局於2015年底加息開始，香港已連續7次未有跟隨加息。反而按揭計劃息率不斷下降，現金回贈亦越加越多，令銀行按揭業務接近冇肉食。現時有好幾間銀行一年定期已有2.5%，較市場新做按揭息率2.25%，仍低0.25%。所以今次上調按揭息率對銀行只係叫幫補下。

聽業界朋友講，因為加P多數就要加存款息率，今次的安排是為了不用加存款息率給存款客，亦都可以迫新做按揭用P按計劃，以後加P就可以賺埋佢地果份。

其實，以每100萬的貸款額，供30年計，按息上調0.1%，每月供款增加$50，真係差一餐茶記。就算P真係加0.25%，都係幾百蚊一個月姐。

另一方面，雖然下月美國加息幾乎已經肯定，加上香港息口已連續7次滯後，但今次銀行已將按息調升，是否暗示年內香港未必加息?不過，即使香港真係加息，市民早已有心理準備應付加息對供樓支出的增加，金管局的三厘「壓力測試」已確定業主的實力，業主的防守力十分穩健，相信加息對香港樓按市場的影響仍屬溫和。