生菜話你知－夾份買樓得唔得

香港樓咁貴，一般打工仔自己真係好難上車(靠父幹除外)。所以有人會考慮同其他人夾份買樓，最普遍就係一對情侶夾份買樓，令到大家對呢份感情有更大commitment咁，聽落幾sweet💑。

嗱，不過老老實實，拍拖唔係結婚就係分手。結到婚就唔使講啦，之後一開二，live happily ever after。不過萬一分手又點算，物業點樣處理呢？宜家樓市咁高，如果將物業賣出去，賺左錢💰💰又點分配呢？

業權有兩種，一種叫俗稱長命契嘅聯權共有，簡單來講就係鬥長命。例如A，B同C一齊買樓，如果A死咗，層樓就屬於B同C。如果之後B死埋，層樓就係C嘅。

另一種叫分權共有，例如D同E一齊買樓，各佔一半業權，如果D死咗，佢嘅一半業權就根據佢嘅遺囑分配。

大家冇事冇幹都OK，但係如果突然間有人想賣樓，對方又唔肯，就可能因為賣左部份業權而令到個單位被釘契。

生菜話你知，有得揀的話，夾份買樓可免則免，因為當中涉及金額較大，很容易引起衝突。