生菜話你知 – 買樓程序你要知

宜家啲樓🏠咁貴，未必人人負擔得起。萬一樓價突然間跌📉咗，有錢嘅你識唔識點樣去買樓？

一手樓就大把AA招呼你啦，咁生菜就講下買二手樓嘅程序。首先要睇你嘅budget，知道自己budget 先知道你可以買幾錢嘅樓。而budget 係代表你手上有幾多錢(係cash)💰同埋你嘅借款能力。

當你計左之後，知道自己可以買六球嘅單位，你就要去想買單位嘅地區啲地產鋪同AA傾吓計，講下你想要嘅要求。又或者上下啲放盤網站，睇睇有冇合適嘅盤。

買樓唔似買菜，生菜建議大家真係勤力啲，叫AA帶你睇多啲樓(你要記住，如果真係成交左，要俾AA幾皮佣金架)，先知道自己鍾意乜嘢。

經AA睇樓，要簽睇樓紙。如果諗住會用老公個名買樓，生菜建議用老婆簽睇樓紙先。因為睇樓紙上有一個條款，經AA1睇完一個單位後半年內的人士，再經AA2買同一個單位，AA1有權問你拎返佣架！

揀啱左單位，落細訂(通常20萬或30萬)前，記得問清楚AA單位是否有事故發生☠，同埋自己上網去銀行估下價。check估價嘅重要性係 1. 有個參考起碼知道成交價是否合理，2. 知道銀行可以根據你嘅成交價去做按揭俾你。

落完細訂同時會簽埋臨約，之後就即刻拎住份臨約去心儀嘅銀行申請按揭啦。通常簽臨約後一個禮拜內就要去代表自己嘅律師樓比大訂。細大訂加埋就係成交價一成。

等到銀行按揭申請批咗，就叫銀行同律師溝通，處理埋啲按揭文件📜，通常兩個月內就可以上多一次律師樓簽名，完成成個程序，就開始你幾十年嘅樓努生涯😔