買樓唔同買生菜，點解人地層樓越升越有，我自己果層就十年如一日？講到最尾都係三隻英文字 ，LOCATION LOCATION LOCATION!!! 唔識雞腸既朋友且聽我娓娓道來點樣理解呢樣野:
- 孟母三遷 只為讀書
家下時光倒流三十年，天下父母為子女奔波讀書既情況比比皆是，有個靚校網自然事半功倍。買樓之前不妨留意一下附近有咩學校，啱返自己子女須要。要留意而家好多直資同私校雖然唔受校網限制，不過你都唔想你個寶貝仔日日搭幾粒鐘車返學掛？
- 週邊環境 靠近自然
香港人日日忙就連火星人都知，週末放下電就必要。香港雖則話係石屎森林，但係無論山同水都出名多。如果屋企靠近呢Ｄ地方，得閒可以落去行下，人都醒神Ｄ啦啦！
- 商場設施 娛樂場所
呢樣就goes without saying 啦，香港人最重要就係方便，地鐵站喺十分鐘步行距離都話遠既，商場喺正樓下就最好啦。不過就算附近無大型商場，有間超市同埋有間七仔其實都已經好夠，始終你未必會日日去行街。
- 和諧關係 最重沐鄰
有樣野你睇樓果陣未必會留意到，而好緊要既係屋苑到底咩人住多。無論係年紀，階層，工作，大家係相類近既話，識個朋友仔都易Ｄ啦！
- 交通便利 出入方便
呢樣野又係唔使講啦，不過要留意既係，可以揀既話唔好揀Ｄ剩係返工方便既地方住。你間樓可以住到十年八年，你份工就可能隨時變，唔通到時轉工又要搵過間屋咩！
- 睇緊治安 出入平安
香港地雖則話罪案率唔高，不過都有Ｄ區域係好人無咁多既。買樓之前留意下附近治安環境，日後老婆仔女出入既都放心Ｄ。而家好多舊區既新樓都係偽豪宅，樓上美綸美煥，樓下就烏煙瘴氣，黃賭毒百花齊放，咁都夠膽話自己係豪宅既真係人唔笑狗都吠啦！
- 新樓供應 谷高樓價
有樣野真係不得不提，有樣野好影響樓價既就係新樓供應！人地以為供應多就代表樓價會跌，而其實而家供應多極都應付唔到個需求，發展商每次有新推出供應幾乎都會加價扯高Ｄ二手樓，所以買樓之前可以留意附近供應。不過當然，如果係太近自己既話，就起碼要準備捱幾年沙塵滾滾既日子啦！
發表迴響