近年樓價升到🚀傻咗，如果賣咗自住樓，套現嘅資金多數唔夠買返較大單位。唔少有換樓需要嘅業主都擔心「落錯車」，即係賣咗自住樓，嚟唔切買返較大單位，所以決定做「雙租族」，即出租自住單位，再貼錢租住其他較大單位。
對於「雙租族」，生菜都認為係較低風險嘅選擇，可以用較低成本去擁有更大嘅居住空間，現金流亦可以更加靈活。而家樓價咁貴，換樓閑閑哋都要比幾十萬印花稅，同埋經紀嘅佣金。呢筆數係冇得供㗎，要即時現兜兜俾出去。同埋依家啲新樓供應比以往多，你完咗租約後，亦都可以去一啲新嘅屋苑去搵一啲又新又低水嘅租盤。
不過，長遠而言，租樓亦要面對要經常同業主傾續租加租等問題，所以「雙租族」亦未必適合每一位朋友，特別係有小朋友嘅家庭。同時，租金收入要交物業稅，但係租金支出並唔可以扣稅，呢點亦都要注意啊！