項目分析 – 嘉熙

白石角而家有六個地盤起緊樓，其中嘉𤋮係第一個開賣的項目。

嘉熙嘅位置相比起其他項目就真係認真麻麻，前面俾逸瓏灣同億京嘅海日灣遮住，隔離就被新地嘅雲匯同億京另一個項目夾住，後面就係創新路，不過依家條路都比較少車行，遲啲多咗人住就應該會比較繁忙。

睇返附近逸龍灣同天賦海灣嘅呎價，大約都係萬三至萬四蚊一呎，但係就全部都係成千萬嘅大單位。嘉熙嘅開放式同一房單位就真係區內嘅首批，呢個開價嘅lump sum亦都係上車客比較接受到嘅。

順便提一提，呢幾個盤咁近中大，將來都會有一班忠實嘅租客，買細單位嘅投資客亦應該大有人在。而家大埔同沙田嘅樓咁貴，亦可能會有班換樓客賣左樓之後買呢度，貪佢新同環境清幽(不過方便程度就真係…😂)。同埋隔離嘅雲匯，新地雷生話咗七月會開賣，以新地賣樓嘅態度，一定會以天價出售，買咗嘉熙嘅朋友可能未收樓，單位已經升值📈。再加埋位置於科學園隔離，政府而家對於科技人才非常渴求，之後可能真係會有好多科技人才係果區出現，對於樓價嘅影響唔使講你都會諗到。

以現時市場狀況同埋啟德地王👑啱啱賣出嘅氣氛，雖然開價都唔太平，但係我哋預期嘉熙嘅收票情況應該會幾理想，頭幾次嘅銷售亦都會即日沽清。