隨著呢幾年經濟良好，好多早期上車嘅朋友已經枱錢將層樓🏠加快供完，但礙於2012年實施嘅雙倍印花稅同之後劃一咗嘅買家印花稅，大大增加買多一層樓嘅成本，好多朋友都唔想益左稅局，眼白白👀望住個市升都唔想或唔敢買多一間收租。但其實只要有一個名下未有住宅物業的直系親屬（即首置客）就可以喺現時嘅情況下慳到超過一半嘅稅（除非層樓價錢超過2千萬，就會慳少d)。
喺印花稅條例中，直系親屬（即父母、子女、配偶💑同埋兄弟姊妹）之間的物業交易時，無論新買家是否已持有物業，買家只須按照「第二標準」交稅俾政府。講多無謂，即刻俾個例子大家睇下。
生菜爸想買多一層樓，生菜仔係首置客。生菜爸就俾錢個仔成為呢層樓嘅買家。當600萬元嘅單位，以「印花稅第二標準稅率」來計算樓價的3%，即18萬元的印花稅，成功購入後，生菜仔以直系親屬的形式轉名至早已持有物業的生菜爸，代價同樣為600萬，同樣要支付「印花稅第二標準稅率」，同樣是樓價的3%或18萬元的印花稅（直係親屬轉讓唔使俾額外印花稅）。咁樣做雖然都俾咗6%，即36萬的印花稅，但對比起由生菜爸直接買，要俾15%印花稅即90萬元，慳咗54萬元。兩公婆都可以用呢個方法令到其中一位變成首置客。
睇完之後，大家會心諗，呢樣野係咪可以無限loop。答案係yes，不過你要間間full pay 先得。因為基本上同名第二個單位可以借嘅按揭已經少好多。同埋每次轉讓都有律師費，當然呢個數同慳咗嘅稅款比較都可以immaterial啦。
都唔知稅局係特登定無意，呢個漏洞咁耐都冇人建議修訂，可能係比條生路有錢人行。生菜暫時就冇本事買多層收租啦，希望呢次可以俾小小建議大家。
發表迴響