上個星期生菜同大家分享左少少有關經紀佣既問題，（唔敢再用個回字，唔係又畀人話我教壞細路），而其實喺同業主同經紀既角力當中亦都有好多小技巧要注意，大家不妨參詳參詳：
1) 勤做功課，google係你好朋友
記得上網睇返同期成交比較，知道業主訂價究竟係屬於進取定保守，所謂知己知彼百戰百勝，你反價時亦較多籌碼，可以由近期成交低位開始叫價。
2) 識人好過識字
同多幾個AGENT 打交道，無人可以話識哂所有野，亦都無人坐哂所有盤。最好同多幾個經紀熟，知道多D行情，有邊D筍盤做緊獨家，有邊一戶叫緊幾多放左幾耐急唔急住走等等等等等。。。總之識多個人問多句野就無話會蝕左底架啦！
3) 汲取前人教訓
通常D 盤放得耐點都會有D 人開過價，仙人問路咁問下經紀之前D 客衰乜開過咩價，咁先唔會重蹈覆切浪費大家時間。
4) 觀人於微，睇人面色
上去人屋企睇樓切忌郁Ｄ做百壇齎主乜都嫌三嫌四諗住鋤個業主價，其實未必個個受呢套，尤其係而家個市旺個個都惜售。你咁壇我間愛屋，你畀得起錢我都叫你過主呀，反而有時見到個識欣賞既人，收順手少少拎個好意頭反而有得傾。
5) 講到最後 ，拎個好意頭
而家間間屋郁Ｄ都話過千萬，爭果一萬幾千對個業主黎講可能真係無乜所謂，為求拎個好意頭可能都肯減D 畀你，一千萬畀你講到988萬，又久又發幾好意頭，你慳返果Ｄ又可以請生菜飲餐茶啦！
發表迴響